GADTB Güney Azərbaycan Demokratik Türk Birliyi
GADTB: İraq hökuməti İran rejiminin dəstəklədiyi qruplar da daxil olmaqla, rəsmi strukturlardan kənarda fəaliyyət göstərən silahlı qrupların tərksilah edilməsi üçün 30 sentyabrı son tarix müəyyənləşdirib və silahların yalnız dövlətin nəzarətində olmasının vacibliyini vurğulayıb.
Əli Faleh əl-Zeydi bildirib ki, bu tarixdən sonra rəsmi təhlükəsizlik və hərbi strukturlardan kənarda fəaliyyət göstərən silahlı qrupların fəaliyyətini davam etdirməsinə heç bir əsas olmayacaq.
Onun sözlərinə görə, İraqın təhlükəsizlik qüvvələri ölkənin sərhədlərini qorumaq və daxili təhlükəsizliyi təmin etmək imkanına malikdir. Hökumət silahlara nəzarəti tam şəkildə rəsmi dövlət qurumlarının ixtiyarına vermək niyyətindədir.
Bu son tarix ABŞ-ın rəhbərlik etdiyi beynəlxalq koalisiyanın İraqdakı missiyasının başa çatması ilə eyni vaxta təsadüf edir. Əl-Zeydi vurğulayıb ki, 30 sentyabr həm də beynəlxalq koalisiyanın ölkədəki missiyasının başa çatması üçün “geri dönüşü olmayan” tarix olacaq.
Bu iki prosesin eyni vaxta təsadüf etməsi Bağdadın koalisiya qüvvələrinin çıxmasından sonra ölkənin təhlükəsizlik strukturunu dövlətin rəsmi qüvvələri üzərində yenidən qurmağa və hökumətdən asılı olmayan silahlı qrupların hərbi fəaliyyətinə son qoymağa çalışdığını göstərir.
