Külək Güney Azərbaycanın Ərdəbil vilayətinə ciddi ziyan vurdu

GADTB-nin Mətbuat Mərkəzinə daxil olan məlumata görə, ötən gün Güney Azərbaycanda sürəti 130 km saata çatan güclü külək Ərdəbil vilayətinin bəzi rayonlarına ciddi ziyan vurub.

Meşkinşəhr rayonunda külək ağacların aşması, mənzillər və mağazaların pəncərələrinin sınması ilə nəticələnib.

Meşkinşəhrin qubernatoru Əkbər Səmədi deyib ki, güclü külək rayonun elektrik şəbəkəsinə ciddi ziyan vurub və bəzi kəndlərə elektrik enerjisinin verilməsi dayandırılıb.

Ərdəbil, Nəmin, Germi, Nir və Səreyin rayonlarında da güclü külək ağacların sınması, reklam tablolarının, bəzi avtomobillərin pəncərələrinin qırılması ilə nəticələnib.

Ərdəbil vilayətinin Hava Proqnozu Bürosu güclü küləyin cümə gününədək davam edəcəyini bildirib.