GADTB Güney Azərbaycan Demokratik Türk Birliyi
GADTB: Təbrizdə molla rejimin İnqilab Məhkəməsinin 2-ci şöbəsi 2023-cü ildə «Demokratlar» adlı müstəqillik yönümlü qrupun yaradılması və üzvlüyü ittihamı ilə saxlanılan Cənubi Azərbaycanın 13 tanınmış siyasi fəalına ümumilikdə 89 il müddətinə şərti olmayan həbs cəzası verib.
Məlumata əsasən, hökm əsassız ittihamlar, uydurma ssenarilər və əvvəlcədən hazırlanmış, stereotip məzmunlu dosyelər əsasında tərtib edilib. Bu cür yanaşma adətən Azərbaycan milli hərəkatını xaricdəki qüvvələr və digər ölkələrlə əlaqələndirməyə cəhd edir.
Çıxarılan hökmlərə görə, Yuruş Mehrəlibəyli qeyri-qanuni qrup yaratmaq ittihamı ilə 6 il 2 ay, ölkə təhlükəsizliyinə qarşı toplantı və əlbirlik ittihamı ilə isə 3 il 7 ay həbs cəzasına məhkum edilib.
İş üzrə digər təqsirləndirilən şəxslər — Hamid Yeganəpur, İbrahim Əvəzzadə, Araz İbrahimnejad, Hüseyn Azadi, Əmirhüseyn Ağayi, Nasir Rəzmcu, Davud Şiri, Cavad Sudbər, Mehrdad Qadiri, Əli Babayi, Mürtəza Nurməhəmmədi və Mirməhəmmədreza Mühədd — hər biri «Demokratlar» adlı qeyri-qanuni qrupa üzvlük ittihamı ilə 2 il 9 ay, həmçinin İran İslam Respublikası sisteminin təhlükəsizliyinə qarşı toplantı və əlbirlik ittihamı ilə 3 il 7 ay həbs cəzası alıblar.
Məlumatlı mənbələrin bildirdiyinə görə, rejimin Kəşfiyyat İdarəsi tərəfindən hazırlanmış ittiham aktı heç bir dəyişiklik edilmədən məhkəmə qərarı kimi qəbul edilib və iş üzrə hakim Rza Əbdi tərəfindən imzalanıb. Hökm nə «Səna» elektron sistemi vasitəsilə təqsirləndirilən şəxslərə bildirilib, nə də onlara rəsmi surəti təqdim edilib. Qərar yalnız vəkil Əsgər Məhəmmədiyə şifahi şəkildə çatdırılıb.
Qeyd olunur ki, bu hökmlər sifarişli xarakter daşıyır. Belə ki, «Demokratlar» işi üzrə təqsirləndirilən şəxslər məhkəmənin açıq keçirilməsini tələb etsələr də, bu tələb qəbul edilməyib, hətta hökmün surətinin onlara verilməsinə də maneə yaradılıb.
