GADTB Güney Azərbaycan Demokratik Türk Birliyi
GADTB: İran daxilində “Starlink” peyk internetinə çıxış ilk dəfə olaraq genişmiqyaslı şəkildə pozulub və bu, İranda internet məhdudiyyətlərinin yeni və misilsiz bir mərhələyə qədəm qoyduğunu göstərir. Bu haqda “Forbes” nəşri məlumat yayıb.
“Bu səviyyədəki pozuntuların oxşar nümunəsi əvvəllər heç vaxt olmayıb”, – məlumatda vurğulanıb.
Qeyd edilib ki, birinci mərhələdə “Starlink” şəbəkəsinə giriş trafiki təxminən 30 faizi kəsilib, bir neçə saat ərzində bu nisbət 80 faizi keçib.
ABŞ prezidenti Donald Tramp isə İran hakimiyyətinin ölkə üzrə interneti kəsməsi fonunda etirazçıların 70 saatdan artıqdır internetə çıxışının olmaması ilə bağlı sualı cavablandırıb.
Tramp bu açıqlamanı Air Force One təyyarəsində jurnalistlərin suallarını cavablandırarkən verib. Bir müxbirin “ABŞ İran xalqına internet təmin edə bilərmi?” sualına cavab olaraq Tramp bildirib ki, məsələni Elon Maskla müzakirə edəcək.
“Bununla bağlı, Elon Maskla danışacağam və biz birlikdə qərar verəcəyik. Siz onun bu sahədə bacarqlı olduğunu və onun uğurlu şirkətə sahib olduğunu bilirsiniz. Əgər mümkün olarsa, interneti bərpa edə bilərik”, – deyə, Tramp vurğulayıb.
Açıqlama İran hakimiyyətinin ölkə daxilində genişmiqyaslı etirazlar fonunda internetə kütləvi məhdudiyyətlər tətbiq etməsindən sonra səsləndirilib.
