GADTB Güney Azərbaycan Demokratik Türk Birliyi
GADTB: Qəzvin prokurorluğu İran daxilində və ölkə xaricində yaşayan 96 nəfərin əmlakının müsadirə edildiyini açıqlayıb və həmin şəxslərin “muzdlu qüvvələr” kimi müəyyən olunduğunu iddia edib.
İran Dövlət Televiziyasının yaydığı məlumata görə, üç nəfər barəsində “casusluq”, altı nəfər barəsində isə “kəşfiyyat fəaliyyəti həyata keçirmək” ittihamı ilə ittiham aktı hazırlanıb.
Məhkəmə və hüquq-mühafizə orqanları indiyədək təqsirləndirilən şəxslərin kimliyi, təqdim olunan sübutlar, məhkəmə prosesi, onların vəkilə çıxış imkanları və açıq məhkəmə keçirilib-keçirilməməsi barədə ətraflı məlumat verməyiblər.
İnsan hüquqları təşkilatları son illərdə İran hakimiyyətinin müxaliflərə, vətəndaş fəallarına və tənqidçilərə qarşı təhlükəsizlik xarakterli və qeyri-müəyyən ittihamlardan geniş istifadə etdiyini dəfələrlə tənqid edib. Həmin qurumlar xəbərdarlıq edirlər ki, məhkəmə şəffaflığı və ədalətli məhkəmə təminatı olmadan təhlükəsizlik işləri üzrə əmlakların müsadirə edilməsi və hökm çıxarılması təqsirləndirilən şəxslərin əsas hüquqlarının pozulmasına səbəb ola bilər.
