Qəzvindən olan azərbaycanlı fəal Rza Behruzi həbsə məhkum edilib

GADTB-nin Mətbuat Mərkəzinə daxil olan məlumata görə, Qəzvindən olan azərbaycanlı fəal Rza Behruzi rejimin Qəzvindəki İnqilab Məhkəməsi tərəfindən həbsə məhkum edilib.

Azərbaycanlı fəal İran rəhbəri Əli Xameneyini tənqid etdiyi üçün 1 il həbs, “ictimai fikri təhrik etmək üçün yalan yaymaq” ittihamına görə isə 10 milyon tümən cərimə cəzasına məhkum edilib.

Eyni zamanda rejimin Dövlət və İnqilab Prokurorluğu Rza Behruzinin xanımı Suri Babayi Çeginiyə çağırış göndərərək onun “hökumətə qarşı təbliğat”da ittiham olunduğunu bildirib və prokurorluğa müraciə etməsini istəyib.

Qeyd edək ki, 2021-ci il avqustun 22-də sosial mediada Rza Behruzinin mülki geyimli təhlükəsizlik məmurları tərəfindən yaxalanaraq naməlum yerə aparıldığını əks etdirən video yayılmışdı. Sonradan ictimai fəalın Əli Xameneinin xaricdən koronovirusa qarşı peyvəndin alınmasını qadağan etdiyinə görə tənqidi videolar paylaşdığı üçün yaxalandığı məlum oldu.