GADTB Güney Azərbaycan Demokratik Türk Birliyi
GADTB: Ərdəbil həbsxanasına köçürüldükdən sonra azərbaycanlı fəallar Əsgər Əkbərzadə, Siyamək Mirzayi və Əli Vasiqinin ailələri onlarla görüşə biliblər. Həyat yoldaşları və övladlarının iştirak etdiyi görüş ayrılıq, həsrət, ümid və dözüm hissləri ilə yadda qalıb.
Məlumata görə, Əsgər Əkbərzadənin 21 gün Ərdəbilin Kəşfiyyat İdarəsinin təcridxanasında saxlanılmasından sonra həbsxanaya köçürülməsi ailə üzvlərində müəyyən rahatlıq yaradıb. Onun Siyamək Mirzayi və Əli Vasiqi ilə eyni yerdə saxlanılması da yaxınlarının narahatlığını qismən azaldıb.
Ailələr görüşə birlikdə yollanıblar. Bildirilir ki, uşaqlar atalarını görəcəkləri anı böyük həyəcanla gözləyiblər. Onlar yolboyu atalarını qucaqlayacaqlarını, onlardan ayrılmayacaqlarını desələr də, həbsxanada görüşün şüşə arxasından keçiriləcəyini öyrənmək onlar üçün çətin olub.
Görüş zamanı uşaqların atalarına ünvanladıqları sözlər duyğulu anlar yaşadıb. Onlar atalarını qucaqlaya bilmədiklərini, onlara olan həsrətlərini dilə gətirərək güclü olmalarını istəyiblər. Eyni zamanda, atalarının haqlı mübarizələrini davam etdirəcəklərinə inandıqlarını ifadə ediblər.
Ailə üzvlərinin sözlərinə görə, Siyamək Mirzayi, Əsgər Əkbərzadə və Əli Vasiqi görüş zamanı yüksək əhval-ruhiyyədə olub, təmkin və qətiyyət nümayiş etdiriblər. Bu görüş həm ailələr, həm də həbsdə olan fəallar üçün unudulmaz xatirəyə çevrilib.
Yaxınları ümid etdiklərini bildiriblər ki, bu çətin günlər geridə qalacaq və uşaqlar gələcəkdə yaşadıqları bu ayrılığı yalnız bir xatirə kimi xatırlayacaqlar.
