Yunanıstan bu dəfə Türkiyənin döyüş gəmilərini bəhanə edir

GADTB: Son zamanlar Ankara-Afina xəttində gərginliyin yenidən artdığı bir vaxtda Yunanıstanın “Kathimerini” qəzeti türk hərbi gəmilərinin Egeyə yerləşdirməsinin gərginliyə səbəb olduğunu yazıb.

Türkiyə ilə Yunanıstan arasında bir müddətdir davam edən isti münasibətlər son zamanlar yerini yeni gərginliklərə verərkən, Yunan mətbuatı Türkiyənin Egeyə 5 döyüş gəmisi göndərdiyini yazıb.

Yunanıstanın müdafiə naziri Nikos Dendiasın türk ordusu və kipr türklərini hədəf alan açıqlaması Ankara ilə Afina arasında gərginliyi artırıb. Prezident Ərdoğan, “Onun bir dəfə ayağa qalxıb orada türklərin işğalçı olduğunu söyləməsindən daha kobud və nalayiq bir ifadə ola bilməz. Ona görə də cənab Miçotakis bu naziri yerinə qoymalıdır” dedi.

Milli Müdafiə Nazirliyindən verilən yazılı açıqlamada, “Cənab Dendiasın türk və yunan xalqları arasında nifaq salaraq siyasi karyera qurma səylərinin nəticə verməyəcəyi” bildirilib.

Yunanıstanın Kathimerini qəzeti Türkiyənin Yunanıstan ərazi suları yaxınlığında döyüş gəmiləri göndərdiyini və bu vəziyyətin iki ölkə arasında gərginliyi artırdığını yazıb. Xəbərdə Krit ilə Cənubi Kipr arasında sualtı kabel çəkilməsi üçün araşdırmalar aparan İtalyan İevoli Relume gəmisinin hazırda bölgədə olduğu bildirilib.

Qəzetə danışan diplomatik mənbələr Türkiyə və Yunanıstan gəmiləri arasında heç bir gərginliyin olmadığını və gərginliyin azaldılması üçün danışıqların aparıldığını bildirib. Yunanıstan hökumətinin sözçüsü Pavlos Marinakis də Afinanın Ərdoğan və Mitsotakis arasında sentyabrda keçiriləcək görüşdən əvvəl dialoqu və müsbət atmosferi davam etdirmək istədiyini bildirib.