GADTB Güney Azərbaycan Demokratik Türk Birliyi
GADTB: Təbriz şəhəri üzrə 15-ci Barışıq Şurasının elektron qaydada göndərdiyi yeni bildirişə əsasən, Azərbaycanın milli və mülki fəalı Peyman Kərimpur müəyyən edilmiş tarixdə işə baxılması və barışıq–uzlaşma cəhdi məqsədilə bu məhkəmə orqanında iştiraka çağırılıb.
Məlumata görə, bildirişdə adı çəkilən şəxsin göstərilən vaxtda Barışıq Şurasında iştirakı məcburi hesab olunur və üzrlü səbəb olmadan iştirak etmədiyi təqdirdə, qüvvədə olan qanunvericiliyə uyğun qanuni qərar qəbul ediləcəyi vurğulanır.
Qeyd edək ki, Peyman Kərimpur daha əvvəl Təbriz İnqilab Məhkəməsinin 2-ci şöbəsi tərəfindən «ölkənin milli təhlükəsizliyinə qarşı toplaşma və əlbirlik», «İran İslam Respublikasına qarşı təbliğat fəaliyyəti» və «İran İslam Respublikasının müqəddəslərinə təhqir» ittihamları ilə ümumilikdə 2 il 5 ay müddətinə azadlıqdan məhrum edilmiş, cəzasını çəkdikdən sonra isə 2 il müddətinə ölkədən çıxışına qadağa qoyulmuşdu.
Həmçinin, o, 1401-ci ilin dey ayında sosial şəbəkələrdə məzmun paylaşmaq yolu ilə «İran İslam Respublikasına qarşı təbliğat fəaliyyəti» ittihamı ilə 4 ay həbs və 2 il müddətinə ölkədən çıxış qadağası cəzasına da məhkum edilmişdi.
Yeni bildiriş, azərbaycanlı mədəni fəallar üzərində məhkəmə və təhlükəsizlik təzyiqlərinin davam etdiyini göstərən növbəti nümunə kimi qiymətləndirilir.
