GADTB Güney Azərbaycan Demokratik Türk Birliyi
GADTB: «Demokratlar» kanalının yaydığı məlumata görə, Azərbaycan Milli Hərəkatının fəalı Əli Babayi Təbrizdən Quşaçay (Miyandab) istiqamətində hərəkət edərkən fiziki aradan götürmə cəhdinə məruz qalıb. Yaxınlarının bildirdiyinə görə, bu marşrut üzrə iki minik avtomobili onun avtomobilini təqib edib.
Məlumata əsasən, Quşaçayın Göytəpə kəndi yaxınlığında avtomobillərdən biri qəsdən bir neçə dəfə toqquşma yaradaraq Əli Babayinin avtomobilini yol kənarındakı dərəyə yönəltməyə və aşırmağa cəhd göstərib. Lakin bu cəhd uğursuz olub. Ardınca digər avtomobilin sərnişinlərindən biri ona doğru atəş açıb. Buna baxmayaraq, Əli Babayi bu sui-qəsddən sağ çıxıb.
Qeyd edək ki, Əli Babayi daha əvvəl 13 digər fəalla birlikdə ümumilikdə 89 ildən artıq həbs cəzasına məhkum edilmişdi. O, «Demokratlar» adlı qrupda üzvlük ittihamı ilə 2 il 9 ay, «ölkənin təhlükəsizliyinə qarşı toplaşma və əlbirlik» ittihamı ilə isə 3 il 7 ay müddətinə azadlıqdan məhrum edilib.
