GADTB Güney Azərbaycan Demokratik Türk Birliyi
GADTB: 5 ordibehişt 1405-ci il tarixində Təbrizdə “Qlobal” nəqliyyat şirkətinin sürücüləri və zərərçəkmişləri şəhər prokurorluğunun binası qarşısında toplaşaraq tələblərinin yerinə yetirilməsini istəyiblər.
Məlumata görə, etirazçılar nəqliyyat vasitələrini yeniləmək məqsədilə bu şirkətə müəyyən məbləğlər ödədiklərini, lakin şirkətin öhdəliklərini yerinə yetirmədiyini bildiriblər.
Bildirilir ki, aksiya altı aydır davam edən qeyri-müəyyənlik və kompensasiyanın ödənilməməsi fonunda keçirilib. Toplaşan şəxslər “ədalət tələb edirik” və “məhkəmə dəstəyi istəyirik” kimi şüarlar əks olunan plakatlar qaldıraraq, aidiyyəti qurumlardan hüquqlarının bərpasını tələb ediblər.
Etiraz edən sürücülərdən biri qeyd edib ki, “Qlobal” şirkəti ötən ilin esfənd ayından prokurorluğun göstərişi ilə fəaliyyətini dayandırıb və açıq müqavilələr üzrə məsələləri həll etməli idi. Lakin işlərin bir çoxu ötən ilin mehr ayından bəri hələ də həll olunmayıb və hətta müqavilələrini ləğv edən şəxslər belə ödənişlərini geri ala bilməyiblər.
Etirazçılar qanunun icrasını, şirkət rəhbərliyinə qarşı ciddi tədbirlərin görülməsini, əmlak və aktivlərin tez bir zamanda müəyyənləşdirilməsini və zərərçəkmişlərə kompensasiyanın ödənilməsini tələb ediblər. Onların sözlərinə görə, bir çox sürücü köhnə nəqliyyat vasitələrini sataraq bu şirkətə qoşulub, lakin şirkətin maliyyə vəziyyətinin pisləşməsi nəticəsində hazırda ciddi çətinliklərlə üzləşiblər.
