Ərdəbil vilayəti qazdan boğulma hallarına görə birinci yerdədir

GADTB-nin Mətbuat Mərkəzinin İran adlanan ölkənin saytlarına istinadən yaydığı məlumata görə, Ərdəbil vilayəti qazdan boğularaq ölmə hallarına görə birinci yerdədir. Bu barədə İran Milli Qaz Şirkətinin rəisi Məhəmmədrza Yusifipur açıqlama verib.

M.Yusifipur qeyd edib ki, 2016-cı il yaşayış evlərində qazdan törənən hadisələr 0.8 faiz, qazın karbon monoksidindən isə boğularaq ölmə halları 34 faiz 2015-ci ilə nisbət artıb. Yusifipurun bildirdiyinə görə ölkə üzrə ümumilikdə 839 nəfər qazdan zəhərlənərək həyatını itirib. Bunlardan 256 nəfəri qazla yanan peç və sairədən yayılan karbon monoksid qazından ölüb, qalanları isə başqa qızdırıcı vasitələrdən yayılan karbon monoksid qazından həyatını itirib.

Qeyd edək ki, təbii qazın qeyri-standart şəraitdə istifadəsi karbon monoksid qazının əmələ gəlməsinə və insanların zəhərlənərək ölməsinə gətirib çıxarır. Ərdəbil vilayətində əhalinin İran rejimin ayrı-seçkiliyi nəticəsində imkansızlığı həyat standartlarını aşağı salıb. Onun nəticəsində Ərdəbil vilayəti bu sahədə birinci yeri tutur.