GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, Tehranın Əllamə Təbatəbayi Universitetində jurnalistika fakültəsinin öyrəncisi azərbaycanlı öyrənci fəalı Melika Qaragözlü bu gün mayın 30-da universitetin inzibati komitəsinə çağırılıb.
Qaragözlü bu gün sosial şəbəkələrdə yaydığı məlumatda bildirib ki, o, universitetin inzibati komitəsi tərəfindən tələbələrin qanunsuz toplantısına qatılmaqda və hicaba riayət etməməkdə günahlandırılıb: “Mənə zəng edib dedilər ki, Əllamə Təbatəbayi Universiteti öyrəncilərinin qanunsuz toplantısına qatıldığıma və hicab qaydalarına riayət etmədiyimə görə inzibati komitəyə gedib ifadə verməliyəm. Mən isə öyrəncilərin toplantısında iştirak etmədiyimi bildirsəm də, dedilər ki, öyrəncilərin əvvəlki toplantılarına qatıldığın üçün inzibati komitəyə gəlib ifadə verməlisən”.
Qeyd edək ki, Melika Qaragözlü 2019-cu ilin noyabrın 18-də Tehranda benzinin qiymətinin kəskin bahalaşmasına qarşı keçirilən kütləvi etirazlar zamanı tutulub 6 ay həbsə məhkum edilsə də, dekabrın 1-də 600 milyon riallıq vəsiqə girovu qarşılığında müvəqqəti olaraq sərbəst buraxılmışdı.
