Azərbaycanlı fəalların növbəti qrupu azərbaycanlı siyasi məhbus Abbas Lisani ilə görüşdü

GADTB-nin Mətbuat Mərkəzinə daxil olan məlumata görə, Güney Azərbaycanda azərbaycanlı milli-mədəni fəalların növbəti qrupu azərbaycanlı siyasi məhbus Abbas Lisani ilə görüşüblər.

Ərdəbildə yaşayan azərbaycanlı milli-mədəni fəallarının başqa bir qrupu fevralın 25-də azərbaycanlı siyasi məhbusla görüş keçiriblər.

Keçirilən görüşdə azərbaycanlı siyasi məhbusun sağlıq durumu, Güney Azərbaycandakı son durum və s. məsələlərdən danışılıb.

Qeyd edək ki, İran rejiminin Ərdəbildəki zindanında həbsdə saxlanılan azərbaycanlı siyasi məhbus Abbas Lisani yanvarın 24-də müayinə və komissiya üzvlərinin rəylərinin öyrənilməsi üçün Ərdəbildə Tibbi Ekspertiza Mərkəzinə aparılmışdı.

İran rejiminin məmurlarının müdaxiləsi nəticəsində müxtəlif xəstəliklərdən, o cümlədən bel-onurğa disk yırtığı xəstəliyindən əziyyət çəkən azərbaycanlı siyasi məhbusun vəziyyəti ağırlaşıb .

2019-cu ilin iyul ayında rejimin Ərdəbildəki İnqilab Məhkəməsinin 1-ci şöbəsi tərəfindən Lisani 8 il həbs və 2 il sürgün cəzasına məhkum edilib.

Daha sonra bu qərar rejimin Ərdəbildəki Apellyasiya Məhkəməsi tərəfindən 2 il sürgün və 15 il həbs cəzasına qaldırılıb.