GADTB Güney Azərbaycan Demokratik Türk Birliyi
GADTB: Yazıçı, jurnalist və tədqiqatçı “Sahir” Ədəbi Dərnəyinin üzvü Əhməd Əsgərpur (Peyam Sarablı) dünyasını dəyişib.
Onun uzun sürən xəstəlik nəticəsində mayın 27-də Məşhəd şəhərində həyatını itirdiyi bildirilib.
1954-cü ildə Sarabda anadan olan Əhməd Əsgərpur (Peyam Sarablı), ilk və orta təhsilini orada başa vurmuş, həmin dövrdən Azərbaycan dili və mədəniyyəti sahəsində fəaliyyət göstərmişdir.
Sonralar Məşhəd şəhərinə köçən ədəbiyyatçı, bu şəhərdəki ictimai və mədəni fəaliyyətinin mühüm bir hissəsini də “Xorasan teatrının inkişafında azərbaycanlı mühacirlərin rolu” mövzusuna həsr olmuş araşdırmalar təşkil edir.
O, bu sahədə “Şifahi teatr tarixi” üslubunda yüzlərlə saatlıq geniş müsahibələr hazırlamış və dəyərli faktlar toplamışdır.
“Məşrutə hərəkatı” və “Azərbaycan folkloru” mövzuları sarablı ədəbiyyatçının ən çox sevdiyi və araşdırdığı sahələr arasında xüsusi yer tutur. Onun bu istiqamətdəki çalışmalarının bəhrəsi kimi, fars dilində hazırlayıb nəşr etdirdiyi “Kitabname-ye Məşrutiyyət” və tərcümə etdiyi “Azərbaycan folklor rəqsləri” adlı əsərlərini nümunə göstərmək olar.
Əhməd Əsgərpur (Peyam Sarablı) bundan əlavə İlham Rəhimlinin “Təbriz Azərbaycan teatrı” kitabını da ərəb qrafikasına köçürərək nəşr etdirmişdir.
