Güney Azərbaycanda misli görünməmiş tapıntı: Misin kəşfi tarixi daha qədimə getdi

Güney Azərbaycanın Leylan bölgəsində nadir tarixi əsərlər aşkar edilib və misin kəşfi ilə bu günə kimi olan nəzəriyyələrin dəyişməsinə səbəb oldu.

Bu barədə İranın mədəni irs və turizm naziri İzzətullah Zərğami açıqlama verib.

Bildirilib ki, bir qadın və bir kişinin skeletlərinin yanında tapılan 5 mis külçəsinin tarixi eradan 6500 il əvvələ aiddir.

“Bu, beynəlxalq səviyyədə misin kəşfi tarixi ilə bağlı nəzəriyyələri dəyişdirir və onun tarixini daha 1500 il əvvələ aparıb çıxarır. Bu dünya arxeologiyasında nadir və əhəmiyyətli hadisədir”,- nazir vurğulayıb.

Qeyd edək ki, Təbrizin 163 km cənub-qərbində yerləşən tarixi Leylan şəhəri bundan əvvəldə nadir tapıntıları ilə gündəmə gəlib.