GADTB Güney Azərbaycan Demokratik Türk Birliyi
GADTB: Bir neçə gün öncə Şəbəstər şəhərində işlədiyi yerdə molla rejimin qüvvələri tərəfindən saxlanılan azərbaycanlı milli fəal Hüseyn Amani-Nadarlinin ailəsi onun vəziyyəti və saxlanma yeri barədə hələ də heç bir məlumat əldə edə bilmədiklərini bildirir.
Ailənin sözlərinə görə, son günlər ərzində Təbriz və Şəbəstər prokurorluqlarına dəfələrlə müraciət edilsə də, nə saxlanma yeri, nə də həbsin səbəbi barədə hər hansı məlumat verilməyib. Məsul şəxslər ailənin sorğularına cavab olaraq “məlumatımız yoxdur” deməklə kifayətlənib və izahat təqdim etməkdən imtina ediblər.
Bu xəbərin yayıldığı ana qədər rəsmi qurumlar tərəfindən həbslə bağlı heç bir açıqlama verilməyib.
Qeyd edək ki, Hüseyn Amani-Nadarli bundan əvvəl, 12 mehr 1404 tarixində təhlükəsizlik orqanları ilə əlaqələndirilən gizli nömrədən telefon zəngi və SMS vasitəsilə Şəbəstər polis idarəsinə çağırılmışdı. O, bu çağırışla bağlı aldığı mesaj və zəngin görüntüsünü paylaşaraq, “işin araşdırılması və sənədlərin tamamlanması” üçün çağırıldığını bildirmişdi.
Amani-Nadarli son illərdə dəfələrlə həbs, istintaqa çağırılma və məhkumluq yaşamış fəallardandır. O, sonuncu dəfə 16 tir 1403 tarixində Təbriz İnqilab Məhkəməsinin 2-ci şöbəsinə çıxmışdı. Daha əvvəl isə 28 ordibeheşt 1402 tarixində təhlükəsizlik qüvvələri tərəfindən saxlanılmış və bir aylıq həbsdən sonra məhkəmə prosesinin sonunadək girov qarşılığında müvəqqəti olaraq azadlığa buraxılmışdı.
