GADTB Güney Azərbaycan Demokratik Türk Birliyi
GADTB: Xıyav (Mişkinşəhər) bölgəsinin Əhmədava (Əhmədabad) kəndində yerləşən “Bal-bal” daş abidələrinin iki nümunəsi tamamilə məhv olmaq təhlükəsi ilə üz-üzədir.
Ərdəbildə fəaliyyət göstərən “Mirəsban” mədəni irs fəallarının məlumatına görə, hündürlüyü təxminən dörd metr olan və Dəmir dövrünə aid edilən bu iki daş abidə uzun illərdir nəzarətsiz vəziyyətdə, təbii təsirlər və insan müdaxilələrinin yaratdığı risklər qarşısında qorunmasız qalıb. Həmçinin bəzi şəxslər bu tarixi daşların üzərinə sprey boya ilə yazılar yazaraq əlavə zərər yetiriblər.
Qeyd olunur ki, Xıyavın Piyrəzman (Piyrəzmiən) kəndindəki daş abidələrdən fərqli olaraq, bu iki nümunə ağız təsviri daşıyır və daha hündürdür.
Bütün tarixi və elmi əhəmiyyətinə baxmayaraq, abidələrin qorunmasına məsul olan Ərdəbil Vilayəti Mədəni İrs İdarəsi tərəfindən indiyədək onların mühafizəsi və daha çox zərərin qarşısının alınması üçün heç bir ciddi tədbir görülməyib. Bu vəziyyət mədəni irs həvəskarlarının ciddi narahatlığına səbəb olub.
