İran adlanan ölkə Teleqram sosial şəbəkəsini tam qadağan etmək istəyir

GADTB-nin Mətbuat Mərkəzinə daxil olan məlumata görə, İran rejimi Teleqram sosial şəbəkəsini İran adlanan yerdə tam şəkildə qadağan etmək niyyətindədir. Bu barədə jurnalistlərə açıqlamasında İran adlanan ölkənin İnformasiya-Kommunikasiya Texnologiyaları naziri Məhəmməd Cavad Azari Caxrumi açıqlama verib.

Cavad Azari Caxrumi deyib: “Teleqram “terrorçuların kanalı”nı bağlamalıdır. Əgər şirkət rəhbərliyi iranlıların tələblərinə hörmət etməsə, o zaman tam olaraq ölkədə fəaliyyətinə qadağa qoyulacaq”.

Qeyd edək ki, İran adlanan ölkədə əhali teleqram kanalından sərbəst istifadə edirdi. Rejim əleyhinə etirazları boğmaq üçün son bir həftədə hakimiyyət teleqram və instaqramı filtirləyib. Bundan öncə isə İran parlamentinin Xarici Siyasət Komitəsinin rəhbəri Əli Rza Rəhimi yanvarın 5-də Teleqram və İnstaqrama qoyulan qadağanın ortadan qaldırılacağını bildirmişdi.