GADTB Güney Azərbaycan Demokratik Türk Birliyi
GADTB: İranın aviasiya sənayesinə qarşı beynəlxalq məhdudiyyətlərin davam etdiyi bir vaxtda, Mahan Hava Yolları şirkətinin İstanbul hava limanındakı fəaliyyətinə yeni məhdudiyyət qoyulub. Gürcüstan da İran aviaşirkətlərinin bu ölkəyə uçuşlarının dayandırılacağını açıqlayıb.
İstanbul hava limanının rəsmiləri Mahan Hava Yolları şirkətinə bildiriblər ki, şirkət sentyabrın sonundan etibarən bu hava limanında fəaliyyətini davam etdirmək icazəsinə malik olmayacaq.
Eyni zamanda, Gürcüstan açıqlayıb ki, sentyabrın 30-dan İran aviaşirkətlərinin bu ölkəyə uçuşları dayandırılacaq. Məlumatlara görə, bu qərarın ardınca sentyabrın 29-dan Tbilisi və Batumi istiqamətlərinə bilet satışı dayandırılacaq, bu istiqamətlər üzrə tur paketləri də ləğv ediləcək.
Gürcüstan Mülki Aviasiya Agentliyi sentyabrın 10-da açıqlamışdı ki, ölkə aviasiya sahəsində beynəlxalq sanksiyaları tətbiq edəcək.
Bu qərar ABŞ Maliyyə Nazirliyinin 27 İran aviaşirkətinə, o cümlədən Ata, Asiman, İran Air Tur, Zaqros, Qeşm Air, Kiş Air və Taban şirkətlərinə sanksiya tətbiq etməsindən sonra gündəmə gəlib.
