GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, Gilan vilayətinin azərbaycanlılar yaşayan bölgələrindən məclisə millət vəkili seçilən və Gilanın əhalisinin 30 faizinin türk olmasına etiraf edən millət vəkili Kazım Dilxoşun mandatı təsdiqlənməyib.
Mayın 31-də keçirilən İran Məclisinin iclasında Diloxşla bərabər Gəçsarandan millət vəkili seçilən Əlirza Tacgərdun və Firidunşəhərdən deputat seçilən Hüseyn Məhəmməd Salehinin mandatları təsdiqlənməyib. Bu millət vəkillərinin mandatının təsdiqlənməməsinin iqtisadi ittihamlar, korrupsiya və məhkəmə tərəfindən barələrində çıxarılan qərarla bağlı olduğu iddia olunur. İran qanunvericiliyinə əsasən, deputat mandatı təsdiqlənməyən şəxsin etiraz etmək haqqı var. Belə halda mandatın ləğvi ilə əlaqədar irəli sürülən ittihamlar müvafiq şöbə və komissiyalarda yenidən araşdırılacaq. Dilxoşun Gilanın əhalisinin 30 faizinin Azərbaycan türkləri olmasına etiraf etməsi də rejimin xoşuna gəlməyən hal kimi dəyərləndirilir.
Qeyd edək ki, Kazım Dilxoş 2018-ci ildə Güney Azərbaycanın Ərdəbil Əyalətində yerləşən “Heyran gədiyi”nin bu əyalətdən ayırıb Gilan Əyalətinə ilhaq edilməsi planına qarşı etirazlar zamanı Gilan əhalisinin ən azı 30 faizinin Azərbaycan türklərindən ibarət olduğunu bildirmişdi.
