Qrossi: “İran nüvə obyektlərindəki ziyanla bağlı məlumat vermir”

GADTB: Dünən Atom Enerjisi üzrə Beynəlxalq Agentliyin (AEBA) baş direktoru Rafael Qrossi bildirib ki, Atom Enerjisi üzrə Beynəlxalq Agentlik İrandan zənginləşdirilmiş uran ehtiyatlarının həcmi və iyun ayında baş verən hücumlardan sonra nüvə obyektlərinə dəyən ziyanın miqdarı barədə heç bir rəsmi məlumat almayıb.

Qrossinin sözlərinə görə, bu məlumatların təqdim olunmaması AEBA-nın vəziyyəti tam və obyektiv şəkildə qiymətləndirməsini çətinləşdirir.

İran Atom Enerjisi Təşkilatının sözçüsü Bəhruz Kamalvəndi isə nüvə texnologiyasının hərbi və mülki tətbiqləri arasındakı fərqlərdən danışaraq bildirib ki, nüvə bombası yaratmaq texniki baxımdan ən asan mərhələdir.

Kamalvəndi qeyd edib ki, nüvə bombası yanacağa və reaksiya prosesinə uzunmüddətli nəzarət tələb etmir və bir anda partlayır. Onun sözlərinə görə, nüvə elektrik stansiyası tikmək isə yanacağa və nüvə reaksiyalarının sürətinə davamlı nəzarət tələb etdiyi üçün daha çətin və mürəkkəb texniki prosesdir.

İranın nüvə proqramına toxunan rəsmi şəxs bildirib ki, ölkə nüvə sahəsində güc həddinə çatıb və bu mərhələdə Tehran üçün artıq naməlum texniki məsələ qalmayıb.