GADTB Güney Azərbaycan Demokratik Türk Birliyi
GADTB: Təbriz Maşınqayırma Qrupu müəssisəsinin 1600 işçisi çərşənbə axşamı, 2 tir tarixində əməkhaqlarının ödənilməməsinə etiraz olaraq tətil edib. İşçilər bu addımı öz qanuni hüquqlarının müdafiəsi kimi qiymətləndiriblər.
İşçilərin sözlərinə görə, yüksək inflyasiya və bahalaşma şəraitində iki aylıq maaşın verilməməsi onların yaşayış vəziyyətini daha da ağırlaşdırıb.
Tətildən sonra Şərqi Azərbaycan valiliyi binasında əmək komissiyasının iclası keçirilib. Lakin indiyədək iclasın nəticələri barədə rəsmi məlumat verilməyib və ostanlıq rəhbərliyi məsələ ilə bağlı açıqlama verməyib.
İran Əmək Konfederasiyasına bağlı olan “Pejvake Kare İran” kanalı bildirib ki, işçilər gecikdirilmiş maaşların dərhal ödənilməsini və əmək hüquqlarının təmin olunmasını tələb edirlər. Təşkilat vurğulayıb ki, işin dayandırılması işçilərin öz hüquqlarını müdafiə etmək üçün istifadə etdikləri ən mühüm vasitələrdən biridir.
Eyni zamanda, Zəncan şəhərində yerləşən Sərcin Baft Fabriki müəssisəsinin rəhbərliyi təxminən 350 işçinin üç aylıq maaş və sosial sığorta borclarına görə keçirdiyi etiraz aksiyasından sonra zavodun fəaliyyətini dayandırıb. İşçilər ostanlıq və əmək idarəsi qarşısında toplaşsalar da, konkret cavab ala bilməyiblər.
Bununla yanaşı, İslamabad-Qərb Səhiyyə Mərkəzinin əməkdaşları da maaş, sosial təminat və yaşayış problemlərinə etiraz olaraq aksiya keçiriblər. Kənd rabitəsi işçiləri isə 1405-ci il əməkhaqqı artımına uyğun fərqin ödənilməsini gözləyirlər.
Qeyd olunur ki, İranda tətil hüquqi baxımdan qeyri-qanuni hesab edilir. Halbuki Beynəlxalq Ədalət Məhkəməsi 31 ordibeheşt tarixli məşvərət xarakterli qərarında tətil hüququnun Beynəlxalq Əmək Təşkilatının 87 saylı Konvensiyası çərçivəsində işçilərin əsas hüquqlarından biri olduğunu təsdiqləyib.
