GADTB Güney Azərbaycan Demokratik Türk Birliyi
GADTB: Təbrizdə uzunmüddətli elektrik kəsintiləri ilə bağlı narazılıqların artması fonunda Təbriz Elektrik Paylayıcı Şirkəti bəzi abonentlər üçün kəsintilərin ikinci mərhələsinin tətbiqi ilə bağlı açıqlama verib.
Təbriz Elektrik Paylayıcı Şirkətinin baş direktoru Əkbər Fərəcniya bəzi abonentlər üçün elektrik kəsintilərinin ikinci mərhələsinin tətbiq edildiyini təsdiqləyib. O bildirib ki, əvvəllər bu mərhələ tətbiq edilmirdi, lakin şəbəkəyə düşən yükün artması və mövcud vəziyyətlə əlaqədar Tehranın göstərişi ilə kəsinti cədvəlinə əlavə edilib.
Fərəcniyanın sözlərinə görə, elektrik kəsintilərinin vaxt cədvəli əvvəlcədən elan olunub və «Barq-e Mən» sistemində də yerləşdirilib.
O vurğulayıb ki, ikinci mərhələ üzrə elektrik kəsintiləri bütün abonentlərə şamil edilmir və abonentlərin təxminən 10–20 faizini əhatə edir.
Təbriz Elektrik Paylayıcı Şirkətinin baş direktoru əlavə edib: «Əvvəllər ikinci kəsinti mərhələsi tətbiq olunmurdu. Lakin Tehranın bildirişi və şəbəkənin yük vəziyyəti nəzərə alınaraq bu mərhələni də əlavə etməyə məcbur olduq».
Təbriz sakinlərinin ən təməl hüquqlarından biri olan elektrik enerjisinin verilməsi ilə bağlı qərarların şəhərin yerli qurumları tərəfindən deyil, Tehran tərəfindən müəyyənləşdirilməsi, İran rejiminin Cənubi Azərbaycana qarşı ayrı-seçkilikçi və müstəmləkəçi siyasətinin göstəricilərindən biridir.
