Tramp: Hörmüz boğazı açıqdır; İran yenidən ABŞ-ın hücumuna məruz qalmaq istəmir

GADTB: ABŞ Prezidenti Donald Tramp Hörmüz boğazının açıq olduğunu bildirib və İran rejiminin Vaşinqtonla qarşıdurmanı yenidən kəskinləşdirməkdən çəkindiyini, çünki bir daha ABŞ-ın hücumlarına məruz qalmaq istəmədiyini iddia edib.

Tramp cümə günü «Aksios»a verdiyi qısa müsahibədə deyib: «O lənətə gəlmiş boğaz açıqdır. İranın reaksiyası çox mülayimdir. Onlar bizim yenidən onların üzərinə getməyimizi istəmirlər. Bütün məsələ bundan ibarətdir.»

Eyni zamanda, ABŞ Mərkəzi Komandanlığının komandanı admiral Bred Kuper bildirib ki, ABŞ qüvvələri İnqilab Keşikçiləri tərəfindən yerləşdirilmiş minaları beynəlxalq gəmiçilik xətlərindən təmizləyib və son aylarda təxminən 750 milyon barel xam neft daşıyan 1 500-ə yaxın ticarət gəmisinin Hörmüz boğazından keçməsinə kömək edib.

ABŞ rəsmiləri «Aksios»a bildiriblər ki, Hörmüz boğazında qüvvələr nisbəti Vaşinqtonun xeyrinə dəyişib. Bunun qarşılığında İnqilab Keşikçiləri hələ də bu su yolunun açıq olması barədə iddianı rədd edir və Hörmüz boğazının bağlı olduğunu bildirir.