GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, Xarici işlər naziri Tahsin Ertuğruloğlu “BMT-dən çox şey gözləmirik, bu günə qədər heç bir siyasi problemi həll etməməsi həqiqəti də göz qabağındadır” deyib.
Şimali Kıbrıs Türk Cümhuriyyətinin (KKTC) xarici işlər naziri Tahsin Ertuğruloğlu Kıbrıs probleminin həlli mövzusunda Birləşmiş Millətlər Təşkilatının (BMT) rolu ilə əlaqədar olaraq “BMT-dən çox şey gözləmirik, bu günə qədər heç bir siyasi problemi həll etməməsi həqiqəti də göz qabağındadır” deyib.
Ertuğruloğlu KKTC Prezidenti Ersin Tatarın BMT Baş katibi Antonio Quterreş və Kıbrıs Rum İdarəsi rəhbəri Nikos Anastasiadis ilə Amerika Birləşmiş Ştatlarının Nyu-York şəhərində keçirdikləri görüşlərdən sonra Vaşinqtonda mətbuat nümayəndələrinə KKTC-nin mövqeyini təqdim etdi.
Quterreşin aprel ayında İsveçrənin Cenevrə şəhərində keçirilən toplantıdan sonra ortaq bir fikir olmadığı qənaətinə gəldiyini, lakin bu nəticəni BMT Təhlükəsizlik Şurasına bildirmədiyini və ikinci toplantının keçiriləcəyini bildirdiyini ifadə edən Ertuğruloğlu 6 ay keçməsinə baxmayaraq bu toplantının təşkil edilmədiyini vurğulayıb.
Ertuğruloğlu Quterreşin hazırda Kıbrıs mövzusunda şəxsi bir səfir təyin etməyi planlaşdırdığını və bu səfirin ortaq zəminin olub olmadığını araşdıracağını söyləyib.
“İndi mənə görə, bu, Baş Katibin zaman üçün tətbiq etdiyi bir taktikasıdır və o, hələ ortaq bir fikir olmadığını bilir” deyə Ərtoğruloğlu bildirib: “Adada iki dövlət var. Hər kəs bilməlidir ki, bu real zəmin olmadıqca və yeni danışıq prosesi iki dövlət arasında danışıqlar prosesinə daxil olmadıqca heç bir danışıq prosesi olmayacaq”.
Ertuğruloğlu BMT-nin Sülhməramlı Qüvvələrinin 1964-cü ildə əslində mövcud olmayan bir Kıbrıs hökumətinə isnad edərək adaya gəldiyini, lakin Kıbrıs Türklərinin acısını azaltmadığını qeyd edərək deyib: “Buna görə də BMT-dən çox şey gözləmirik. BMT-nin bu günə qədər heç bir siyasi problemi həll etməməsi göz qabağındadır”.
