Azərbaycanlı vəkil Tahir Nəqəvinin sağlıq durumu ağırlaşıb

GADTB: İrqçi fars-molla rejimin Evin zindanında həbsdə saxladığı azərbaycanlı vəkil Tahir Nəqəvinin sağlıq durumu ağırlaşıb.

Azərbaycanlı hüquqşünas və fəal Tahir Nəqəvidən alınan MRT görüntüləri və tibbi sənədlər onun fiziki vəziyyətinin ciddi şəkildə pisləşdiyini göstərir.

Böyük çətinliklə xəstəxanadan əldə edilən bu sənədlərdən onun saxlandığı müddətdə məruz qaldığı təzyiqlər, təkadamlıq kameralar, antisanitar həbsxana şəraiti nəticəsində onurğa sütununun dörd fəqərəsinin ciddi zədələnməsi görünür.

Həkimlər də təsdiq ediblər ki, Tahir Nəqəvinin ciddi sidik kisəsi və prostat problemləri var və bu xəstəliklər həbsxanadan kənarda, təcili ixtisaslaşmış müalicə tələb edir. Lakin Evin həbsxanasının məsul şəxsləri təhlükəsizlik və məhkəmə orqanlarının təzyiq və tövsiyələrini əsas gətirərək, onun müvafiq tibb mərkəzlərə göndərilməsinə mane olurlar.

Tahir Nəqəvinin ailəsi və insan haqları təşkilatları bu vəziyyətin davam etməməsi ilə bağlı xəbərdarlıq edib və onun sağlamlığına dəyəcək hər hansı zərərə görə İran İslam Respublikasının təhlükəsizlik və məhkəmə qurumlarının məsuliyyət daşıyacağını bildiriblər.