Bir həftə ərzində İranda etirazlar zamanı azı 16 nəfər öldürülüb

GADTB: Ölkə üzrə etirazların davam etdiyi bir vaxtda yayılan hesabatlar ölənlərin sayının artdığını, həbslərin genişləndiyini və etirazların İranın onlarla şəhər və vilayətinə yayıldığını göstərir.

Məlumatlara görə, etirazların ilk yeddi günü ərzində azı 15 etirazçı həyatını itirib. Etiraz aksiyaları bu müddətdə 25 vilayətin 60 şəhərində, ümumilikdə 174 nöqtədə qeydə alınıb və ən azı 582 nəfər saxlanılıb.

Hərana xəbər agentliyi etirazlarda tələbələrin fəal iştirak etdiyini bildirərək, qeyd edib ki, bu zaman kəsiyində azı 18 universitetdə etiraz aksiyaları və tələbə hərəkatları müşahidə olunub.

Eyni zamanda, Qum şəhərində yerli rəsmilər iki nəfərin öldüyünü təsdiqləyiblər. Onlardan birinin 17 yaşlı yeniyetmə olduğu açıqlanıb. İkinci şəxsin ölüm səbəbi ilə bağlı isə hökumətyönlü media fərqli və ziddiyyətli məlumatlar yayıb.

Müstəqil mənbələrin bildirdiyinə görə, son səkkiz gün ərzində etirazlar azı 23 vilayəti və onlarla şəhəri, əsasən kiçik və orta şəhərləri əhatə edib. Bu statistika ölkədə ictimai narazılığın davamlı və geniş miqyas aldığını göstərir.