GADTB-nin Mətbuat Mərkəzinə daxil olan məlumata görə, İran rejiminin Qərbi Azərbaycan vilayətinin Urmiya şəhərindəki zindanında həbsdə saxlanılan Türkiyə vətəndaşı Hatəm Özdəmir ölüm cəzasına məhkum edilib. Bu barədə rejimin Xoy şəhərindəki İnqilab Məhkəməsi qərar çıxarıb.
Rejimin Xoy şəhərindəki İnqilab Məhkəməsinin 1 saylı şöbəsinin Özdəmirə qarşı “İranın islam quruluşuna qarşı silahlı üsyan” ittihamı ilə çıxardığı edam hökmü martin 15-də ona elan edilib.
Qeyd edək ki, 2019-cu il yayının əvvəllərində Maku şəhərində yaxalanan Hatəm Özdəmir rejimin Urmiyadakı ETTELAAT İdarəsinin təcridxanasına aparılıb və orada dindirildikdən sonra Urmiya zindanına köçürülüb.
Türkiyə vətəndaşının hansı qrupa bağlı olduğu və törətdiyi cinayət əməli ilə bağlı açıqlama verilmir.