GADTB Güney Azərbaycan Demokratik Türk Birliyi
GADTB: ABŞ-ın İran ətrafında hərbi mövcudluğunun artması fonunda İsrailin yüksək rütbəli hərbi rəsmiləri fövqəladə iclaslar keçirərək İrana qarşı mümkün əməliyyat planlarını yekunlaşdırıblar. Xəbər mənbələrinə görə, İsrail Hərbi Hava Qüvvələrinin komandanı Tomer Bar və Hərbi Kəşfiyyat İdarəsinin rəhbəri Şlomi Binder əməliyyat planlarının təsdiqi və tamamlanması üçün geniş müzakirələr aparıblar. Bildirilir ki, ABŞ-ın Tehrana hücumu halında bu planlar birgə hərbi addımlara yol aça bilər.
Məlumata əsasən, İsrail özü hücuma məruz qalacağı təqdirdə belə bir ssenaridə iştirak etməyə hazırdır. Bu hərəkətlər NBC telekanalının Donald Trampın Yaxın Şərqdə yerləşdirilən ABŞ hərbi “armadası”ndan necə istifadə edəcəyinə dair hələ yekun qərar vermədiyi barədə məlumatı ilə eyni vaxta təsadüf edir.
ABŞ rəsmilərinin sözlərinə görə, “Abraham Lincoln” aviadaşıyıcısı və onu müşayiət edən hərbi gəmilər İranın əməliyyat zonasına yaxınlaşır. Həmçinin bölgədəki ABŞ hərbi gəmilərində 450-dən çox “Tomahawk” qanadlı raketin yerləşdirildiyi bildirilir.
Hərbi hazırlıqlarla yanaşı, diplomatik səylər də davam edir və ABŞ ilə İran arasında dolayı danışıqlar cümə günü Omanın paytaxtı Maskatda başlayıb. Buna baxmayaraq, artan gərginlik İsrailin Vaşinqton və Tehran arasında böhranın dərinləşməsi ehtimalına qarşı müxtəlif ssenarilərə hazırlaşdığını göstərir.
