Netanyahu: Razılaşma olsa da, olmasa da, İranın nüvə silahı əldə etməsinə imkan verməyəcəyik

GADTB: İsrailin Baş naziri Benyamin Netanyahu, SEPAH komandirlərindən Əhməd Vəhidinin son bəyanatına münasibət bildirərək, İsrailin İran İslam Respublikasının nüvə silahı əldə etməsinin qarşısını almaqda qətiyyətli olduğunu vurğulayıb.

Netanyahu deyib: “Bu gün SEPAH komandirinin İran İslam Respublikasının nüvə proqramını davam etdirmək niyyətini açıq şəkildə ifadə etdiyini eşitdik. Mən İsrailin Baş naziri kimi bu məsələdə qətiyyətliyəm və İran İslam Respublikasının nüvə silahına sahib olmasına imkan verməyəcəyəm.”

İsrailin Baş naziri ABŞ Prezidenti Donald Trampı da İsrailin ən yaxın müttəfiqlərindən biri adlandıraraq bildirib: “Prezident Tramp bizim böyük dostumuzdur və Ağ Evdə indiyədək sahib olduğumuz ən yaxın dostlardan biridir. ABŞ bizim əsas müttəfiqimizdir və İranın nüvə ambisiyalarına qarşı ABŞ ilə birgə göstərdiyimiz səyləri yüksək qiymətləndiririk.”

Netanyahu əlavə edib ki, İsrailin təhlükəsizliyi və mövcudluğu danışıqlar mövzusu deyil və Təl-Əviv İranın nüvə təhlükəsi qarşısında öz mövqeyindən geri çəkilməyəcək.

O bildirib: “İsrailin mövcudluğu müzakirə predmeti deyil. Razılaşma əldə olunsa da, olmasa da, mən və bütün İsrail rəhbərliyi ölkəmizin təhlükəsizliyini və gələcəyini təmin etmək üçün zəruri olan hər addımı atmaqda qərarlıyıq.”