GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, dekabr-yanvar etirazlarında Təbrizdə yaxalanan azərbaycanlı öyrənci fəalı Röya Səğiri həbs müddətini keçirmək üçün Təbriz zindanına salınıb.
Təbriz Mədəni Universitetinin öyrəncisi Röya Səğiri cümə günü öz İnstaqram səhifəsində məlumat yazaraq, şənbə günü həbs ediləcəyini açıqlamışdı.
Röya Səğiri yazmışdı: “Hökmün icrası üçün çağırılmışam. Sabah gedəcəm, bu azacıq azadlığımı da zalimcəsinə məndən alacaqlar. Azadlığım daha da məhdudlaşacaq. Qoy onları tarix mühakimə etsin”.
Qeyd edək ki, azərbaycanlı öyrənci fəal Röya Səğiri Təbrizdə irqçi fars rejiminin ədalətsizlik və ayrı-seçkilik siyasətinə qarşı keçirilən aksiyalar zamanı Təbrizdə yaxalanmışdır.
Məcburi hicaba qarşı çıxan azərbaycanlı öyrənci “sistemin əleyhinə təbliğat aparmaq” və “sistemin əsaslarını aşağılamaq” kimi uydurma ittihamlarla üzləşərək, 23 ay həbs cəzasına məhkum edilib. Fəala qarşı çıxarılan hökm iyul ayında Apelyasiya Məhkəməsi tərəfindən olduğu kimi qüvvədə saxlanılıb.
Azərbaycanlı öyrənci bundan əvvəl Təbriz İnqilab Məhkəməsinin 2-ci şöbəsi tərəfindən “sistemin əleyhinə təbliğat aparmaq” ittihamı ilə 8 ay və “rəhbəri təhqir etmək” ittihamı ilə 18 ay həbs cəzasına məhkum edilib. Həmin məhkəmənin qərarı da Apelyasiya Məhkəməsi tərəfindən olduğu kimi təsdiqlənib.
Azərbaycanlı ictimai fəal Röya Səğiri bundan öncə də başqa bir dosyeyə ilə “qanunsuz yığıncağa qatılmaqla ümumi asayişi pozmaq” və “hicabsız şəkildə ictimai yerlərə çıxmaq” kimi uydurma ittihamlarla qarşılaşaraq, 1 il şərti həbs, 10 şallaq zərbəsi və müəyyən miqdarda pul cəriməsi ödəməyə məhkum edilmişdir.
