GADTB-nin Mətbuat Mərkəzinin “Azad İran”a istinadən yaydığı məlumata görə, İran rəhbəri Əli Xamenei martın 6-da parlamentin “bəyan cihadı və hibrid müharibə” üçün təsdiq etdiyi büdcəni tənqid edib.
Xamenei bu barədə deyib: “Keçmiş təcrübələr də göstərir ki, bu büdcə vəsaitləri çox vaxt boş yerə xərclənir”.
Ötən günlərdə İran parlamenti ölkənin Mədəniyyət Nazirliyinin mətbuat xidmətinin rəis müavininə hibrid müharibə və bəyan cihadında media məzmunu hazırlamaq və nəşr etmək üçün 100 milyard tümən vəsait ayırıb. “Bəyan cihadı” Əli Xameneinin çıxışından sonra İran hökumətinin rəsmi təbliğat açar sözlərinə əlavə edilən yeni terminlərdən biridir. İran parlamentinin üzvləri daha mühüm məsələlərdə, məsələn 2019-cu ildə benzinin bir gecədə kəskin bahalaşması hadisəsində göstərdilər ki, ali rəhbərin seçimləri qarşısında onların heç bir ixtiyarı yoxdur və hazırda da Xameneinin “yumşaq müharibə” ilə bağlı büdcəni tənqid etməsindən sonra millət vəkillərindən biri parlamentin büdcəyə düzəliş edəcəyini bildirib. Əli Xamenei hakimiyyətinin ilk aylarından “mədəni işğal” barədə xəbərdarlıq edib və bu mövzu ötən 30 il ərzində onun dövründə hökumətin siyasətində həmişə mərkəzi yer tutub.