GADTB Güney Azərbaycan Demokratik Türk Birliyi
GADTB: Cənubi Azərbaycanda milli hərəkat fəalı olan və Qərbi Azərbaycanın Urmiya şəhərində yaşayan Əta Kərimiyə verilmiş 2 il müddətinə azadlıqdan məhrumetmə cəzası İran Ali Məhkəməsinin 9-cu şöbəsi tərəfindən dəyişdirilmədən qüvvədə saxlanılıb.
Ali Məhkəmənin 9-cu şöbəsinin sədri Qasım Mezinani və müavin Məhəmməd Təqianinin iştirakı ilə – Kəriminin verdiyi kassasiya şikayətini rədd edərək, əvvəlki hökmü tam şəkildə təsdiq edib.
Bundan əvvəl Urmiya İnqilab Məhkəməsinin 3-cü şöbəsi hakimlər Nəcəfzadə və Bəzrpaşın qərarı ilə Kərimini İran İslam Cəza Məcəlləsinin 499-cu maddəsi (2013-cü il redaksiyası), eləcə də “təzyiri həbsin azaldılması haqqında” qanunun 2-ci maddəsi və Cəza Məcəlləsinin 18-ci maddəsinin “b” bəndinə əsasən 2 il həbs cəzasına məhkum etmişdi.
Qeyd edilib ki, İnqilab Məhkəməsinin 3-cü şöbəsinin məsləhətçiləri qeyri-adi bir addım ataraq, Cinayət-Prosessual Məcəlləsinin 428-ci maddəsinin ikinci hissəsinə (siyasi və mətbuat işləri üzrə hökmlərin Ali Məhkəmədə kassasiya qaydasında araşdırılması) istinad etmiş, bu işi həmin kateqoriyaya daxil etmiş və bununla da fəalın adi apellyasiya hüququnu məhdudlaşdırmışdılar.
Həmçinin bildirilir ki, Əta Kərimi 1394-cü ilin Xordad ayının ortalarında Ümumdünya Ətraf Mühit Günündən əvvəl Urmiya gölünün qurumasına qarşı keçirilən etirazlar zamanı SEPAH-ın təhlükəsizlik qüvvələri tərəfindən Qulam Quluzadə, Sina Həsəni və Əli Əzizi adlı digər üç fəalla birlikdə saxlanılmışdı. Onlar bir müddət sonra məhkəmənin son qərarınadək girov qarşılığında sərbəst buraxılmışdılar.
Xəbərdə bildirilir ki, bu iş üzrə daha əvvəl iki dəfə “təqibə yer olmadığı” barədə qərar çıxarılsa da, o vaxtkı müstəntiq müavininin (Xudayi) etirazından sonra iş yenidən gündəmə gətirilmiş və təxminən 10 il davam edən prosesdən sonra hökm rəsmən təsdiqlənmişdir.
Fəallar müdafiələrində irəli sürülmüş ittihamları dəfələrlə rədd etmiş və bunları “əsassız iddialar və SEPAH kəşfiyyatının sənəd düzəltməsi” kimi qiymətləndirmişdilər.
