GADTB Güney Azərbaycan Demokratik Türk Birliyi
GADTB: Son günlər Vaşinqtonun bir sıra Avropa ölkələri ilə apardığı məsləhətləşmələrdən sonra Hörmüz boğazının təhlükəsizliyi məsələsi Ankarada keçiriləcək NATO toplantısının gündəliyinə daxil edilib.
ABŞ-ın irəli sürdüyü təklif ticarət gəmilərinin mühafizəsi, dəniz təhlükəsizliyi ilə bağlı xəbərdarlıqların mübadiləsi, mümkün təhdidlərə qarşı fəaliyyətin əlaqələndirilməsi və kəşfiyyat məlumatlarının paylaşılmasına yönəlib.
Məlumatlara görə, təklif olunan plan NATO qüvvələrinin Fars körfəzində daimi yerləşdirilməsini nəzərdə tutmur. Vaşinqton üstünlük verir ki, Avropa ölkələrinin dəniz missiyaları NATO-nun komandanlıq, müşahidə və informasiya mübadiləsi dəstəyi ilə həyata keçirilsin. Məqsəd Hörmüz boğazında ABŞ və NATO qüvvələrinin SEPAH-la birbaşa qarşıdurma ehtimalını azaltmaqdır.
Bununla yanaşı, Böyük Britaniya və Fransa Omanın koordinasiyası ilə və hər iki ölkənin hərbi gəmələrinin əsas rol oynayacağı çoxmillətli dəniz missiyasını hazırlayırlar. Bu missiyanın məqsədi Hörmüz boğazında gəmiçiliyin təhlükəsizliyini təmin etməkdir.
Bildirilir ki, Paris NATO, Avropa dəniz missiyası və bölgədə fəaliyyət göstərən dəniz komandanlıqları arasında koordinasiya mexanizmi hazırlayır. Məqsəd mümkün insidentlər zamanı gəmiçilik şirkətləri, sığorta qurumları və hərbi-dəniz qüvvələri arasında operativ əlaqənin təmin edilməsidir.
Gözlənilir ki, Ankara NATO toplantısında Hörmüz boğazında dəniz təhlükəsizliyi üzrə məhdud koordinasiya çərçivəsi təsdiqlənəcək. Bu çərçivənin əsas məqsədi Fars körfəzində NATO-nun hərbi mövcudluğunu genişləndirmədən ticarət gəmilərinin təhlükəsiz hərəkətini gücləndirməkdir.
