GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, Rusiyanın Tehrandakı səfiri Levan Caqaryanın İngiltərənin Tehrandakı yeni səfiri Simon Şerklif ilə rəsmi Tvitter hesabında paylaşdığı foto iranlıların narazılığına səbəb olub. Caqaryan paylaşımında “İngiltərənin səfiri Simon Şerklif ilə 1943-cü ildə Tehran Konfransının keçirildiyi tarixi pilləkəndə görüşümüz” ifadəsini yazıb.
İranın xarici işlər naziri Məhəmməd Cavad Zərif səfirin paylaşımına sərt reaksiya verib.
Zərif qəzəblənərək deyib: “2021-ci ilin avqustunun nə 1941-ci ilin, nə də 1943-cü ilin dekabrı olmadığını xatırlatmağa ehtiyac var? İran xalqı nüvə razılaşması danışıqları da daxil olmaqla, heç vaxt xarici səfirliklərin və ya xarici güclərin göstərişinə tabe olmayacağını göstərdi”.
Həmin foto və yazı sosial media istifadəçiləri arasında da reaksiyalara səbəb olub.
Qeyd edək ki, İranın 28 noyabr-1 dekabr 1943 tarixlərində İngiltərə Prezidenti Uinston Çörçill, Sovet İttifaqı dövlət başçısı İosif Stalin və ABŞ Prezidenti Franklin Ruzvelt arasında İranda keçirilən Tehran Konfransına o dövrün İran rəhbərliyi dəvət edilməmişdi.
