GADTB Güney Azərbaycan Demokratik Türk Birliyi
GADTB: Tanınmış azərbaycanlı yazıçı Səməd Behrənginin əsəri əsasında hazırlanan “Balaca Qarabalıq” türk tamaşası Yaqub Sədiq-Cəmalinin quruluşunda və Sənəm Riyazinin hekayəçi iştirakı ilə Təbriz Şəhər Teatrında səhnəyə qoyulub.
55 azyaşlı uşağın iştirakı ilə nümayiş etdirilən tamaşa sənət və türk dili həvəskarları tərəfindən böyük maraqla qarşılanıb. Tamaşanın nümayişlərindən birinin sonunda tamaşaçılar “Balaca Qarabalıq”ın yaradıcı heyətini və sənətçilərini ayaqüstə alqışlayıblar.
Türk dilində hazırlanan tamaşa hər gün iki seansda — saat 18:00 və 19:45-də — Tərbiyyət salonunda (Daneşsəra meydanı, Təbriz Şəhər Teatrının Mədəniyyət və İncəsənət Kompleksi) tamaşaçıların görüşünə təqdim olunur.
Bu kimi tamaşalar, eləcə də “Koroğlu”, “Qaçaq Nəbi” kimi digər əsərlərin səhnələşdirilməsi və ənənəvi, milli türk musiqisi proqramlarının keçirilməsi yerli və milli incəsənətin tamaşaçı cəlb etmək və bölgənin mədəni kimliyini yaşatmaq baxımından böyük potensiala malik olduğunu göstərir.
Azərbaycanlıların türk teatrı və musiqisinə böyük maraq göstərməsinə baxmayaraq, bəzi ifratçı və türk düşməni İranşəhri cərəyanları həqiqətə uyğun olmayan iddialar və sənət əsərlərinə qarşı müxtəlif ittihamlarla Azərbaycan vilayətlərinin mədəniyyət idarəçiliyinə və türk sənətçilərinə qarşı koordinasiyalı hücumlara başlayıblar. Bu, əvvəllər də müşahidə olunan və məqsədi mədəniyyət sahəsində təhlükəsizlik mühiti yaratmaq, türk sənətini yenidən durğunluğa sürükləmək olan davranışdır.
