GADTB Güney Azərbaycan Demokratik Türk Birliyi
GADTB: “Azad Avropa Radiosu”nun 16 oktyabr 2026-cı il tarixli məlumatına görə, Şərqi Türküstanın Qulca şəhərində bir sıra polis əməkdaşları uyğur türkcəsində danışdıqlarına görə vəzifələrindən uzaqlaşdırılıblar.
Bir polis əməkdaşının sözlərinə görə, şəhərdəki polis məntəqələrindən birində çalışan səkkiz nəfər uyğur dilindən istifadə etdiklərinə görə işdən çıxarılıb. Mənbə həmçinin eyni səbəbdən ümumilikdə təxminən 100 polis əməkdaşının işini itirdiyini bildirib.
Bəzi keçmiş polis əməkdaşlarının ifadələrinə görə, əvvəllər polis işində uyğur dilindən istifadə geniş yayılmışdı, inzibati məlumatlar və hesabatlar da əməkdaşlara bu dildə təqdim edilirdi.
Bu məlumat Çin hökumətinin Şərqi Türküstandakı dil siyasətinin geniş tənqidlərlə üzləşdiyi bir vaxtda yayılıb. Si Cinpin 2013-cü ildə hakimiyyətə gəldikdən sonra təhsil sistemində və ictimai sahələrdə Çin dilindən istifadəyə verilən önəm artıb. Bu siyasət uyğurların ana dilindən istifadəsinin məhdudlaşdırılmasına, onların dil və mədəni kimliyinin zəiflədilməsinə səbəb olan amillərdən biri kimi qiymətləndirilir.
