GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, Avstraliya Azərbaycan Assosiasiyası və GADTB-nin təşkilatçılığı ilə dünən Sidneydə keçirilən Azərbaycana dəstək aksiyası bir sıra Azərbaycan saytlarında da işıqlandırılıb.
AZƏRTAC bu barədə yazır ki, iyulun 23-də Avstraliya Azərbaycan Assosiasiyasının (AAA) üzvləri Ermənistan silahlı qüvvələrinin atəşkəs rejimini kobud şəkildə pozaraq Azərbaycanla sərhəddə törətdiyi hərbi təxribata etiraz bildirmək məqsədilə Sidney şəhərində etiraz aksiyası keçiriblər.
Yeni Cənub Uels ştatının parlament binası önündə keçirilən etiraz aksiyasında “Yaşasın Azərbaycan!” və “Qarabağ Azərbaycandır!” şüarları səsləndirilib, Ermənistanın təcavüzünə son qoyulmasına çağırıblar.
Qeyd edək ki, Yeni Cənub Uels ştatında koronavirus pandemiyasının qarşısının alınması məqsədilə tətbiq olunan qaydalara əməl edərək məhdud sayda və sosial məsafə gözlənilməklə təşkil olunmuş aksiyada iştirak edən azərbaycanlılar Ermənistanın işğalçı siyasəti barədə həqiqətləri ştat parlamentarilərinə və yerli ictimaiyyət nümayəndələrinə çatdırmağa çalışıblar.
Aksiyadan sonra diaspor təşkilatının ofisində toplaşan həmyerlilərimiz düşmən təcavüzü nəticəsində şəhid düşmüş hərbçilərimizi yad edərək, hər zaman dövlətimizin və xalqımızın yanında olduqlarını bildiriblər.
