GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, dünən cümə günü günortadan öncə Güney Azərbaycanın Fəthəli Palaz Hamarı qışlağında Muğanın Şahsevən Elat Festivalı keçirilib. Festivala qatılan Ərdəbilin məclisdəki millət vəkili Südeyf Bədri konstitusiyanın 15-ci maddəsinə toxunaraq, deyib ki, dövlət ana dilini məktəblərdə tədris etməyə borcludur.
Bədri deyib ki, ana dilinin unudulmaması üçün konstitusiyanın 15-ci maddəsi icra edilməlidir. Lakin indiyə kimi seçkilərdə vədə verilib amma icra edilməyib. Lakin mən məktəb və universitetlərdə türk dilinin tədrisi üçün 142 millət vəkilinin imzası ilə layihə təqdim etmişəm. Dövlət türk dilini məktəblər və universitetlərdə tədris etməyə borcludur.
Qeyd edək ki, Şahsevən elat tayfalarının əksəriyyəti Ərdəbil və Şərqi Azərbaycan əyalətlərində yaşayır. Bu türk tayfası özünəməxsus həyat tərzi ilə məşhurdur. Hazırda Ərdəbil Əyalətində 80 min nəfərdən çox olan 15 min əşayir ailəsi yaşayır. Onların Ərdəbil Əyalətində sayı son iki onillikdə 30 faiz azalıb. Ərdəbil rəsmiləri bunu əşayirlərin gəlirinin az olması ilə izah edir. Şahsevən əşayirləri bir çox istisadi problemlərlə üz-üzə qaldıqları üçün doğma vətənlərini tərk edərək müxtəlif şəhərlərə köçüblər.
