Paris Sülh Konfransında qəbul edilən Şimali Azərbaycanın xəritəsi və sərhədləri – Şəkil

GADTB: 1919-cu ildə Paris Sülh Konfransında Azərbaycan Cümhuriyyəti öz rəsmi xəritəsini təqdim edib. Bu xəritədə Cümhuriyyət elan ediləndə sərhədlər böyük dövlətlərlə yanaşı, qonşu Gürcüstan və Ermənistanla da rəsmi şəkildə müəyyənləşib.

Kult.az xəbər verir ki, siyasi elmlər üzrə fəlsəfə doktoru, dosent Zaur Əliyev Cümhuriyyət elan edildikdən sonra Azərbaycan, Gürcüstan və Ermənistan sərhədlərinin göstərildiyi xəritənin şəkilini paylaşıb. Alim bildirib ki, bu xəritə 1919-cu ildə Azərbaycan Cümhuriyyəti tərəfindən Paris Sülh Konfransında təqdim edilib və hər üç ölkə tərəfindən qəbul edilib.

Xəritədən görünür ki, Ermənistan Paris Sülh Konfransında qəbul edilən xəritəni dəyişdirmək üçün Göyçə gölünün şərq sahillərini, Göyçə mahalını, Dərələyəz, Meğri, Qafan, Zəngəzur ərazilərini Sovet Rusiyasının dəstəyi ilə ələ keçirir və 1923-cü ildə isə Dağlıq Qarabağ Muxtar Vilayətinin yaradılmasına nail olur.

“Gürcüstan da ikitərəfli müqaviləni pozaraq, Azərbaycanın 1919-cu il Paris Sülh Konfransında təqdim etdiyi rəsmi xəritədə Azərbaycanın ərazi bütövlüyünə qarşı əsassız iddia irəli sürüb, lakin istəyinə çatmayıb. Buna baxmayaraq, Sovetlər dönəmində sərhəd bölgələrdə birgə istifadə üçün razılaşdırılmış icarə torpaqlarını geri qaytarmayıb”, – alim qeyd edib.