Krımın tatar türkü Ukrayna xarici işlər nazirinin birinci müavini təyin edildi

GADTB-nin Mətbuat Mərkəzinə daxil olan məlumata görə, Krımın tatar türklərindən Əminə Caparova Ukrayna Xarici İşlər nazirinin birinci müavini təyin edilib.

Ukrayna Xarici İşlər naziri Dmitri Kuleba “Facebook”da bu barədə yazıb:

 “Komanda güclü bir oyunçu ilə tamamlandı. Əminə Caparova xalq diplomatiyası, beynəlxalq təşkilatlar, dövlət protokolu, Krım məsələləri ilə məşğul olacaq. Ancaq birinci müavin olaraq əlbəttə ki, onun vəzifələri daha çox olacaq”.

Nazir vurğulayıb ki, Ə. Caparova Ukraynanın xarici siyasətində Krım tatarlarının əsas təmsilçisi olacaq.

Qeyd edək ki, Krım tatarı Ə. Caparova ukraynalı fəal və jurnalistdir. O, 2015-2019-cu illərdə İnformasiya Siyasəti Nazirliyində, habelə 2011–2015-ci illərdə Krım Tatar televiziya kanalı olan “ATR”-də və “Azadlıq” radiosunda çalışıb.