İraq İranla bir neçə sərhəd-keçid məntəqəsini bağlayıb, bu ölkəyə uçuşları dayandırıb

GADTB: IraqiNews xəbər verib ki, İraq hökuməti ölkə ərazisindən Səudiyyə Ərəbistanına həyata keçirilən dron hücumundan sonra İranla bir neçə sərhəd-keçid məntəqəsini bağlayıb və Bəsrə ilə İran arasındakı uçuşları ikinci bir açıqlamaya qədər dayandırıb.

Məlumata görə, Şələmçə sərhəd-keçid məntəqəsi bağlanıb. Həmçinin əş-Şeyb, Zərbatiyə və əl-Münzəriyyə keçid məntəqələrində məhdudiyyətlər tətbiq olunub. Kürdüstan Regional Hökumətinin nəzarətində olan sərhəd-keçid məntəqələri isə fəaliyyətini davam etdirir.

Səudiyyə Ərəbistanı bildirib ki, İraq ərazisindən buraxılan pilotsuz uçuş aparatları ölkənin Şərq-Qərb neft kəmərini hədəfə alıb. Bağdad bu hücumu pisləyib. Dronların İraq ərazisindən buraxıldığı müəyyənləşdikdən sonra isə İraq ordusunun bir zabiti vəzifəsindən azad edilib.