GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, ana dili hüququ uğrunda mədəni mübarizələrinə görə həbs edilən Əlirza Fərşi, Behnam Şeyxi və Həmid Mənafi Nadarlı Evin zindanın qeyri-münasib şəraitinə etiraz etdiklərinə görə, ayrı-ayrı bölmələrə köçürülüblər.
Azərbaycanlı fəallar ailələri ilə qısa telefon əlaqəsində bu barədə məlumat veriblər.
Məlum olub ki, Behnam Şeyxi Evin zindanının 4-cü bölməsinə, Həmid Mənafi Nadarlı 8-ci bölməsinin 8-ci zalına, Əlirza Fərşi isə 8-ci bölməsinin 9-cu zalına köçürülüblər.
Qeyd edək ki, Azərbaycanlı fəallar Əkbər Azad, Əlirza Fərşi, Behnam Şeyxi və Həmid Mənafi Nadarlı barəsində Baharistan İnqilab Məhkəməsinin 1-ci şöbəsi tərəfindən 10 il həbs və 2 il sürgün qərarı çıxarılmışdır.
Yanvarın 20-də isə Tehran Apelyasiya Məhkəməsinin 54-cü şöbəsi azərbaycanlı fəallar Əkbər Azad, Əlirza Fərşi, Behnam Şeyxi və Həmid Mənafi Nadarlını 2014-cü ildə Tehranın yaxınlığında yerləşən Nəsimşəhrdə Beynəlxalq Ana Dili Günü mərasiminə qatıldıqları üçün əvvəlki qərarı 2 il həbs və 2 il sürgün cəzası ilə dəyişdirmişdir.
Həmin fəallar bir neçə digər türk fəalla bərabər 2014-cü ilin fevral ayında Tehran vilayətinin Baharistan şəhərində Ana Dili Gününü qeyd etdikləri zaman yaxalanmışdılar.
