Yəmən hökumət qüvvələri Təiz vilayətinin qərbində irəliləyir: husilərdən bir neçə mövqeyi geri alınıb

GADTB: Yəmənin rəsmi hökumətinə bağlı silahlı qüvvələr bildiriblər ki, Təiz vilayətinin qərbində yerləşən «Əl-Kədəhə» cəbhəsində əməliyyatların davamı olaraq, İran İslam Respublikasının dəstəklədiyi husilərdən bir neçə strateji mövqeni geri alıblar.

Əl-Ərəbiyyə xəbər verir ki, Yəmən hökumət qüvvələri və «Vətən qalxanı» bölmələri «Əl-Miyhal» və «Əl-Məkazmə» ərazilərinə, eləcə də «Əl-Həmra», «Əs-Səvda» və «Əş-Şeyki» təpələrinə nəzarəti ələ keçiriblər.

Təiz cəbhəsinin qərargah rəisi general-mayor Əbdüləziz əl-Məcidi bildirib ki, əməliyyat husilərdən Əl-Kədəhə bölgəsinin geri alınması məqsədilə başlayıb və birgə qüvvələrin irəliləyişi davam edir.

Mənbələrin məlumatına görə, bu istiqamətdə döyüşlər hələ də şiddətli şəkildə davam edir.