GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, Güney Azərbaycanın Ərdəbil şəhərində rejimin İrşad və Mədəniyyət İdarəsinin tapşırığı ilə Kömür filminin nümayişinə qoyulan qadağadan bir gün sonra etirazlar nəticə verdi. Artıq Azərbaycan türkcəsində hazırlanan Kömür filminin kinotetrda ekranlarına çıxmasına icazə verilib.
Kömür filminin rejissoru İsmayıl Münsif oktyabrın 23-də öz İnstagram hesabında yazıb ki, İslam Respublikasında bütün mədəni fəaliyyətləri tənzimləyən dini qurum ilk öncə filmin vilayətdə nümayişinin dayandırılmasını “pantürkistlərin fəaliyyətinə zəmin yaratmamaq” məqsədi ilə əsaslandırmışdı.
Hal-hazırda Kömür filmi Tehran, Ərdəbil və Təbriz kinoteatrlarında nümayiş olunur. Həmin filmin premyerası oktyabrın 9-da Təbrizin “Setare-Baran” kinoteatrında və oktyabrın 12-də Ərdəbilin “İnqilab” kinoteatrında keçirilmişdi.
Son 10 il ərzində Güney Azərbaycan vilayətlərində çəkilən filmlərin çoxu türkcə çəkilir və bu filmlərin sayı getdikcə artmaqdadır.
Qeyd edək ki, Güney Azərbaycanının Astara şəhərində çəkilmiş Kömür filminin ssenari müəllifi və rejissoru İsmayıl Münsif və prodüseri fransalı Etienne de Ricaudur. Bu film Təbriz və Tehranda nümayiş etdiriləndən sonra Ərdəbildə onun nümayişinə qadağa qoyulmuşdu.
