Ekoloqlardan xəbərdarlıq: “Xəzər dənizinin səviyyəsi kəskin azalır”

GADTB: İranın ətraf mühit qurumları Xəzər dənizində müşahidə olunan sürətli su azalması ilə bağlı ciddi narahatlıqlarını ifadə edərək, bölgənin ən mühüm ekosistemlərindən biri üçün artan risklər barədə xəbərdarlıq ediblər.

İranın Ətraf Mühitin Mühafizəsi Təşkilatının Dəniz Çirklənməsinin Tədqiqi və Nəzarəti Departamentinin rəhbəri Omid Sədiqinin sözlərinə görə, Xəzər dənizinin səviyyəsi 1995-ci ildən bəri ümumilikdə təxminən 2,5 metr aşağı düşüb.

Onun bildirdiyinə görə, bu azalmanın təxminən 1 metri yalnız son dörd-beş il ərzində baş verib ki, bu da prosesin son dövrdə əhəmiyyətli dərəcədə sürətləndiyini göstərir.

Mütəxəssislər dayazlaşmanın ekoloji və iqtisadi nəticələrinin qarşısını almaq məqsədilə regional fəaliyyət planı üzərində iş aparıldığını bildiriblər. Sənədin bu yay Tehranda keçiriləcək beş Xəzəryanı ölkənin COP7 sammitində müzakirəyə çıxarılması nəzərdə tutulur./ Azad İran