GADTB Güney Azərbaycan Demokratik Türk Birliyi
GADTB: İran Ali Məhkəməsinin 44-cü şöbəsi Cinayət Prosessual Məcəlləsinin 474-cü maddəsinin “ç” bəndinə istinad edərək və törədildiyi iddia olunan əməlin cinayət hesab edilmədiyi qənaətinə gələrək, vəkil və azərbaycanlı fəal Məhəmmədrza Fəqihi barəsində yenidən məhkəmə baxışı tələbi ilə razılaşıb.
Məhəmmədrza Fəqihi daha əvvəl Tehran İnqilab Məhkəməsinin 15-ci şöbəsi tərəfindən, hakim Əbülqasım Sələvatinin sədrliyi ilə “ölkənin təhlükəsizliyini pozmaq məqsədilə toplaşma və əlbir olmaq” ittihamı üzrə məhkum edilmişdi. O, hazırda Evin həbsxanasında cəzasını çəkir.
Məlumatlara görə, hökmün çıxarılması üçün əsas götürülən yeganə sübut onun Vəkillər Kollegiyasının binası qarşısında keçirilən dinc aksiyada iştirakı olub.
Ali Məhkəmənin yenidən baxılma tələbini qəbul etməsi Məhəmmədrza Fəqihinin işi üzrə məhkəmə prosesinin yenidən araşdırılması və ona qarşı irəli sürülmüş ittihamların bir daha qiymətləndirilməsi üçün hüquqi zəmin yarada bilər.
