İran və ABŞ arasında İsveçrədə keçirilən texniki danışıqlar başa çatıb

GADTB: İran dövlət mediasının yaydığı məlumata görə, İsveçrədə İran və ABŞ nümayəndələri arasında aparılan texniki danışıqlar yekunlaşıb.

Məlumatlara əsasən, tərəflər nüvə proqramı və sanksiyalar məsələləri üzrə xüsusi işçi qruplarının yaradılması barədə razılığa gəliblər.

İran xarici işlər nazirinin müavini Kazım Qəribabadi bazar ertəsi keçirilən danışıqları şərh edərək bildirib ki, danışıqlar iştirakçıları dörd işçi qrupunun yaradılması barədə qərar qəbul ediblər:

Sanksiyaların ləğvi üzrə işçi qrupu

Nüvə məsələləri üzrə işçi qrupu

İqtisadi bərpa və inkişaf üzrə işçi qrupu

Nəzarət və icra üzrə işçi qrupu

Qəribabadinin sözlərinə görə, bu işçi qrupları əldə olunan razılaşmaların texniki detalları üzərində işləyəcək və müxtəlif sahələr üzrə danışıqların davam etdirilməsinə cavabdeh olacaqlar.

O əlavə edib ki, məqsəd gələcək yekun razılaşma üçün texniki mexanizmlərin hazırlanması və tərəflər arasında əldə edilən öhdəliklərin icra qaydalarının müəyyənləşdirilməsidir.